Hasselhoff-skiltaþjófur stórslasaði afgreiðslumann

Afgreiðslumaður verslunar í bænum Shelton í Connecticut-fylki Bandaríkjanna slasaðist alvarlega í dag þegar hann reyndi að stöðva mann sem hafði stolið auglýsingaskiltum af leikaranum David Hasselhoff.

Að sögn lögreglu varð afgreiðslumaðurinn var við mann sem var að setja skiltin inn í sportjeppa sinn. Þegar afgreiðslumaðurinn reyndi að stöðva þjófinn varð hann fyrir jeppanum og dróst með honum nokkurn spöl.

Maðurinn, sem er 36 ára gamall starfsmaður Cumberland Farm-verslanakeðjunnar, liggur nú á spítala með alvarlega höfuðáverka.

Lögregla leitar nú þjófsins en á skiltunum auglýsir Hasselhoff ískaffi sem kallast „Iced Hoffee“, eða „Ís-Hoffí“ eins og það gæti útlagst á íslensku. Að sögn talsmanns Cumberland Farm hefur rúmlega 500 skiltum af þessu tagi verið stolið úr verslunum víða um Bandaríkin á undanförnum mánuðum.