Nýr grískur ríkismiðill hefur fréttaflutning

Nýr grískur ríkisfjölmiðill, EDT, hóf útsendingar frétta í morgun, tveimur mánuðum eftir að stjórnvöld lögðu niður fyrri ríkisstöð, ERT.

Rekstur ERT þótti allt of dýr í ljósi ástandsins í Grikklandi og var Öllu starfsfólki ERT sagt upp, samtals um 2.700 manns. Margir þeirra héldu þó áfram að senda út fréttir á vefnum og í gegnum gervihnött.

Nýlega voru 500 manns ráðin til starfa við nýju stöðina, til tveggja mánaða.

EDT hóf að vísu útsendingar í júlí, en síðan þá hefur stöðin aðallega sýnt gamlar svart-hvítar kvikmyndir.

Fulltrúar starfsfólks ERT, eldri stöðvarinnar, hafa lýst því yfir að þeir muni áfram senda út fréttir á netinu.