Handtekinn með riffil og skotvopn í grunnskóla

Tvítugur maður að nafni Michael Brandon Hill var handtekinn við grunnskóla í Atlanta í Georgíufylki í Bandaríkjunum í dag en maðurinn hafði í fórum sínum 500 skot og var vopnaður riffli. 

Samkvæmt vefsíðu BBC hélt maðurinn tveimur í gíslingu á skrifstofu skólans og skaut hann að lögreglumönnum sem höfðu umkringt skólann. 

Starfsmaður skólans, Antoinette Tuff, var annar gíslanna og sagði hún í viðtali við fréttamenn að hún hefði talað Hill til og beðið hann um að gefa sig fram við lögreglu. 

Rýma þurfti bygginguna í hvelli þegar upp komst um tilræðismanninn og voru allir 800 nemendur skólans sendir heim. Enginn slasaðist í aðgerðunum. 

Hinn tvítugi tilræðismaður var handtekinn og sætir nú fjölda ákæra, meðal annars fyrir grófa árás á lögregluþjón og hryðjuverkaógn.

Cedric Alexander, yfirlögregluþjónn á svæðinu, segist ekki vita til þess að Hill hafi þekkt nokkuð til skólans og að tilefnið sé algjörlega óljóst. Þá telja lögregluyfirvöld að tilræðismaðurinn hafi komist inn í skólann með því að ganga á eftir einhverjum sem hafði aðgang, annað hvort á eftir nemanda eða starfsmanni.

Timothy Hill, bróðir tilræðismannsins, segir í samtali við ABC fréttastofuna að bróðir sinn hafi lengi átt við geðræn vandamál að stríða. Frá sex ára aldri hafi hann tekið inn lyf vegna hegðunarvandamála.