Eldur í jarðgöngum í Noregi

Eldur kom upp í flutningabíl í Stórasandsgöngunum í Skaun, skammt vestur af Þrándheimi, í Noregi í morgun og er vitað að einn maður hefur látist í brunanum.

Slökkvilið var kallað út um klukkan korter yfir tíu í morgun að íslenskum tíma. Lars Nelvald hjá aðgerðarstjórn í Syðri Þrándheimi segir í samtali við Vísi að slökkvilið hefði staðfest að búið væri að slökkva eldinn, sem kom upp í útlenskum flutningabíl inni í göngunum.

Lars segir að pólskur flutngabíll hafi ekið á fólksbíl í göngunum með þeim afleiðingum að eldur kviknaði í flutningabílnum. Staðfest sé að einn maður hafi látist í brunanum en fleiri hafi ekki hlotið skaða af.

Reykkafarar frá slökkviliðum beggja vegna ganganna hafi farið inn í göngin og leitað af sér allan vafa með það og þá hafi annað fólk ekki slasast í eldinum.

Reykkafararnir þurftu að hafa sig alla við til að komast að eldinum frá báðum munum ganganna sem eru 3.653 metrar að lengd eða 3,6 kílómetrar. 

Mikinn reyk lagði frá göngunum og var öll umferð beggja vegna þeirra stöðvuð. Göngin liggja á milli Engang og Storsanden í Syðri-Þrændalögum.

Bílstjóri flutningabílsins kom sér sjálfur út úr göngunum en hinn látni var líklega bílstjóri fólksbílsins sem hann ók á segir Lars. Nú séu tæknimenn lögreglu að skoða vettvang slyssins.

Hægt er að fylgjast með framvindu málsins á heimasíðu VG.