Loftárás á sama hverfi og varð fyrir efnavopnaárás í gær

Stjórnarherinn í Sýrlandi gerði í morgun loftárásir á úthverfi höfuðborgarinnar, Damaskus, þar sem stjórnarandstaðan sakar menn Assads forseta um að hafa beitt efnavopnum í gær.

Mannréttindasamtök sem fylgjast með ástandinu í Sýrlandi segja óljóst með mannfall í sprengjuárásunum í morgun, en orrustuþotur hafi gert fjölmargar árásir á úthverfi Damaskus.

Fréttirnar af efnavopnaárásinni í gær vakti mikinn óhug um heim allan en allt að 1.300 manns eru sögð hafa látist af þeirra völdum. Stjórnvöld neita þó staðfastlega að hafa beitt slíkum vopnum.

Öryggisráð Sameinuðu þjóðanna kom saman vegna málsins í gær, en Bretland, Bandaríkin og Frakkland hafa kallað eftir tafarlausri rannsókn á málinu.

Sendinefnd frá SÞ er nú þegar í landinu til að kanna fyrri ásakanir um notkun efnavopna í borgarastyrjöldinni í Sýrlandi, sem hefur kostað rúm 100.000 manns lífið síðan átök hófust fyrir rúmum tveimur árum.