Mubarak úr fangelsi á sjúkrahús

Hosni Mubarak brosti lítillega þegar hann var fluttur á börum inn á sjúkrahús í Kaíró, nýkominn úr fangelsi í sömu borg.

Hann verður hafður í stofufangelsi á sjúkrahúsinu og á enn yfir höfði sér þunga fangelsisdóma vegna aðildar að láti fjölda mótmælenda í uppreisninni, sem varð honum að falli í ársbyrjun 2011. Þau málaferli halda áfram í næstu viku.

Hann á einnig yfir höfði sér refsingu í tveimur málum, sem tengjast spillingu.

Lausn hans úr fangelsinu í dag tengist hins vegar því að málsókn á hendur honum fyrir að hafa þegið gjafir frá ríkisreknu dagblaði skilaði engu.

Nokkrir stuðningsmanna Mubaraks komu saman í dag fyrir utan fangelsið til að sýna honum stuðning, veifuðu myndum af honum og hrópuðu slagorð.

Mubarak, sem stjórnaði Egyptalandi áratugum saman, er orðinn 85 ára. Ýmsum sögum hefur farið af heilsufari hans eftir að hann hraktist frá völdum. Hann hefur verið sagður hafa fengið hjartaáfall, heilablóðfall og verið í dái um tíma.

Ákvörðun stjórnvalda um að hafa hann í stofufangelsi er sögð tengjast öryggisráðstöfunum, sem gripið var til fyrr í mánuðinum eftir að stjórnin réðst til atlögu gegn mótmælendum í Kaíró.

Þær aðgerðir kostuðu hundruð manna lífið. Í kjölfarið var lýst yfir neyðarástandi og útgöngubann er í gildi á næturna.