Netfyrirtækin fengu milljónir dala frá NSA

Þjóðaröryggisstofnun Bandaríkjanna (NSA) greiddi bandarískum fyrirtækjum á borð við Google og Yahoo stórfé fyrir upplýsingar um netnotkun fólks.

Þetta kemur fram í leyniskjölum, sem bandarísk stjórnvöld birtu á miðvikudaginn. Breska dagblaðið The Guardian skýrir frá þessu.

Stofnunin greiddi fyrirtækjunum milljónir dala, eða hundruð milljóna króna, fyrir fyrirhöfnina, en í staðinn fengu bandarískir leyniþjónustumenn aðgang að upplýsingum um netnotkun einstaklinga.

Þetta er fyrsta staðfesting þess að greiðslur hafi komið frá bandarísku leyniþjónustunni fyrir aðgang að þessum upplýsingum.

Greiðslurnar hófust í kjölfar dómsúrskurðar árið 2011, þar sem fram kom að NSA þurfti að geta greint á milli þess hvort upplýsingarnar snerust um netnotkun Bandaríkjamanna eða netnotkun útlendinga. Annað væri stjórnarskrárbrot.

Í frásögninni á vefsíðu The Guardians segir að samkvæmt skjölum, sem blaðið hefur fengið frá uppljóstraranum Edward Snowden hafi þessi dómsúrskurður valdið leyniþjónustunni töluverðum vandræðum.