Einn af hverjum þremur telur mögulegt að „leiðrétta“ samkynhneigð

Í kjölfar frétta af fyrirhuguðu banni á tilraunum til að „leiðrétta“ kynhneigð samkynhneigðra ungmenna í New Jersey hefur Pew-rannsóknarstofnunin endurbirt niðurstöður rannsóknar frá því í fyrra þar sem fram kemur að 36 prósent Bandaríkjamanna telja að samkynhneigðum megi snúa til gagnkynhneigðar. Ríflega helmingur telur að það sé ekki hægt.

Til samanburðar voru niðurstöður samskonar rannsóknar frá 2003 á þá leið að 42 prósent töldu samkynhneigða geta orðið gagnkynhneigða á meðan 42 prósent töldu það ekki mögulegt.

„Hin umdeilda hugmynd að kynhneigð sé „læknanleg“ er nógu slæm, en það sem verra er að margir þeirra sem eru settir í slíka meðferð eru undir lögaldri,“ segir  Ross Murray hjá GLAAD-samtökunum, sem eru réttindasamtök hinsegin fólks í Bandaríkjunum. „Þau hafa ekki valið sér þessa meðferð sjálf og hafa mögulega verið neydd til þess af forráðamönnum sem taka mark á trúarleiðtogum.“

New Jersey-fylki verður annað fylkið til þess að banna slíkar meðferðir á eftir Kaliforníufylki.