Vesturlönd íhuga "alvarlegar aðgerðir" í Sýrlandi

Barack Obama og David Cameron ræddust við í gær og segjast halda öllum möguleikum opnum varðandi það hvort ákveðið verði að ráðast inn í Sýrland. Þeir eru sammála um það að komi í ljós að meint notkun efnavopna reynist á rökum reist megi búast við „alvarlegum" aðgerðum af þeirra hálfu.

Meirihluti Bandaríkjamanna hefur þó lagst gegn hernaðaríhlutun í Sýrlandi samkvæmt könnun sem Reuters lét gera í seinni hluta ágúst.

Þannig leggjast 60% bandaríkjamanna gegn hernaðaríhlutun á meðan einungis sex prósent segjast fylgjandi. Aðspurðir segist fjórðungur hinsvegar fylgjandi hernaðaríhlutun ef í ljós kemur að hersveitir Assad forseta hafa notað efnavopn til að drepa óbreytta borgara á meðan 46% eru mótfallnir.

Bandaríkjamenn eru líkast til orðnir langþreyttir á stríðsrekstri í Mið-Austurlöndum en innrás þeirra í Afganistan og Írak hefur kostað Bandaríska skattgreiðendur um fjórar til fimm billjónir dollara.

Nánar er sagt frá málinu á vef Reuters.