Neyðarástand í San Francisco: 5.500 heimili í hættu

Ríkisstjóri Kaliforníu, Jerry Brown, hefur lýst yfir neyðarástandi í San Francisco vegna skógarelda sem nú geisa í Yosemite-þjóðgarðinum, rúmlega 200 kílómetra frá borginni.

Yfirvöld telja að eldurinn geti ógnað raforku og vatnsbirgðum borgarinnar. Eldurinn hefur nú logað í um vikutíma í vesturhluta Sierra Nevada fjallgarðinum og eru um 5.500 heimili talin eiga það á hættu að verða eldinum að bráð.

Ríflega 2.600 slökkviliðsmenn berjast nú við eldinn en illa gengur þó að koma böndum á eldinn. Í gær hafði eldurinn þrefaldast að styrk á einum sólahring. Allt kapp er nú lagt á að stöðva útbreiðslu eldsins í þjóðgarðinum sem er einn af vinsælustu ferðamannastöðum í ríkinu.