Lance Armstrong semur vegna meiðyrðarmáls

Lance Armstrong, sjöfaldur meistari í Tour de France hjólreiðakeppninni, hefur komist að samkomulagi við dagblaðið Sunday Times vegna málsóknar sem eigendur blaðsins höfðuðu gegn honum.

Armstrong fór í mál við blaðið fyrir níu árum þegar Sunday Times skrifaði að íþróttamaðurinn hefði ítrekað notað ólögleg lyf á ferli sínum. Armstrong hafnaði þessum ásökunum eindregið og krafðist þess að blaðið greiddi honum hátt í tvö hundruð milljónir í miskabætur en á endanum samþykktu eigendur blaðsins að greiða honum um 55 milljónir.

Eftir að Armstrong viðurkenndi loks á síðasta ári að hafa í raun notað ólögleg lyf fór blaðið í mál við Armstrong. Blaðið krafðist þess að Armstrong endurgreiddi milljónirnar 55 og að auki 130 milljónir í miskabætur.

Nú hafa blaðið og Armstrong komist að samkomulagi og málið hefur verið látið niður falla. Ekki fæst uppgefið í hverju samkomulagið felst en báðir aðilar lýstu yfir ánægju sinni með það í gær.