Ritstjórar á Norðurlöndunum skrifuðu Cameron opið bréf

Ritstjórar Politiken í Danmörku, Dagens Nyheter í Svíþjóð, Aftenposten í Noregi og Helsingin Sanomat í Finnlandi skrifuðu opið bréf til David Cameron, forsætisráðherra Bretlands sem birtist í The Observer í dag.

Tilefnið er handtaka og 9 klukkutíma yfirheyrsla breskra yfirvalda á David Miranda, kærasta Glenn Greenwald, blaðamanns The Guardian.

Í bréfinu hvetja ritstjórarnir Cameron til að grípa til aðgerða svo Bretland megi aftur vera í fararbroddi þjóða sem standa vörð um frelsi fjölmiðla.

Hegðun breskra yfirvalda undanfarnar vikur sé ógn við sjálfstæði fjölmiðla um heim allan og handtaka lögreglunnar á Miranda hafi verið kornið sem fyllti mælinn.

Þá gagnrýna ritstjórarnir Cameron harðlega fyrir að styðjast við hryðjuverkalög til að áreita og hræða blaðamenn sem og aðila þeim tengdum.