Fimm í haldi vegna hópnauðgunar

Fimm menn hafa verið handteknir í Mumbai á Indlandi, grunaðir um að hafa nauðgað 22 ára konu sem starfaði sem blaðaljósmyndari á svæðinu.

Hópnauðgunin átti sér stað á fimmtudaginn og voru fjórir menn handteknir skömmu síðar. Sá fimmti og síðasti var handtekinn í Delhi í morgun.

Konan var að störfum í auðu iðnaðarhúsi ásamt karlkyns starfsfélaga sínum þegar mennirnir réðust á þau.

Maðurinn var laminn í árásinni áður en mennirnir nauðguðu konunni.

Glæpir af þessu tagi eru algengir á Indlandi og dregur almenningur nú í efa að ný strangari viðurlög við kynferðisglæpum hafi mikil áhrif í fækkun afbrota.