Krókódíll banaði sundgarpi

Talið er að krókódíll hafi banað manni í Ástralíu þegar hann fékk sér sundsprett í á í norðurhluta landsins. Líkamsleifar mannsins eru ófundnar.

Maðurinn var í afmælisveislu nálægt ánni þegar hann og félagi hans ákváðu að synda í ánni. Þeir hunsuðu aðvörunarskilti sem vara fólk við fjölda krókódíla á svæðinu.

Mennirnir tveir höfðu synt að öðrum bakka árinnar og voru á leið tilbaka þegar krókódíllinn réðst á þá. Annar þeirra slapp óskaddaður frá krókódílnum en skelfingu lostnir afmælisgestir fylgdust hjálparlaus með þegar krókódíllinn synti í burtu með fórnarlamb sitt í skoltinum.

Krókódílar á þessum slóðum geta orðið allt að sjö metrar að lengd og eitt tonn að þyngd.