New York ríki í mál við Donald Trump

Ríkissaksóknari New York hefur ákært bandaríska auðjöfurinn Donald Trump fyrir rekstur háskóla án tilskilinna leyfa á árunum 2005-2011. Trump er einnig sakaður um að hafa blekkt  nemendur skólans varðandi ýmsa þætti námsins.

Saksóknarinn, Eric T. Schneidermann, krefur Trump um 40 milljónir dala, eða um 4,8 milljarða íslenskra króna. 

Samkvæmt ákærunni var skólinn, Trump háskóli, síendurtekið staðinn að því að ljúga til um framboð námskeiða og að auglýsa að Trump hefði sjálfur valið kennaralið skólans. BBC hefur eftir heimildum að Trump hafi ekki valið einn einasta kennara.

Trump hafnaði ásökununum á Twitter-síðu sinni og sagði yfirsaksóknara New York ríkis „reyna að kúga sig með málsókninni“. Síðan þá hefur Trump sagt ákæruna vera af pólitískum toga  og gefið í skyn að fundur ríkissaksóknara New York með Barack Obama, forseta Bandaríkjanna, í síðustu viku, hafi eitthvað með málið að gera.