Rannsókn heldur áfram í Sýrlandi

Eftirlitsmenn frá Sameinuðu þjóðunum hófust í morgun handa við að rannsaka svæðið í Sýrlandi þar sem talið er að efnavopnum hafi verið beitt, annan daginn í röð.

Skotið var á eftirlitshópinn í gær þegar hann var á leið á svæðið en þrátt fyrir það hefur verið ákveðið að halda rannsókninni áfram. John Kerry utanríkisráðherra Bandaríkjanna sagði í gær að sönnunargögnin fyrir því að efnavopnaárás hafi átt sér stað væru óhrekjanleg. Spurningin er hinsvegar hverjir hafi staðið að baki árásinni því Sýrlandsher segir uppreisnarmenn hafa gert það á meðan uppreisnarmenn segja stjórnvöld ábyrg.

Vesturveldin taka flest undir með uppreisnarmönnum og líkurnar á hernaðaríhlutun í landinu hafa aukist vegna þessa. Samtökin læknar án landamæra segja að á miðvikudaginn síðasta hafi 3600 manns komið á þrjá spítala á svæðinu og allir hafi sjúklingarnir sýnt merki eiturvopnaárásar. 355 þeirra hafi látist.