Gerðu grín að kynleiðréttingu Manning

Bandaríska sjónvarpsstöðin Fox News fjallaði um málefni Chelsea Manning fyrr í þessum mánuði en eins og kunnugt er var hún dæmd 35 ára fangelsi meðal annars fyrir njósnir hjá þjóðaröryggisstofnun Bandaríkjanna.

Í þættinum Fox & Friends, sem er á dagskrá á stöðinni, var fjallað um kynleiðréttinguna. Áður en farið var í auglýsingahlé var sagt í örstuttu máli frá fréttinni um Chelsea og hljómaði lagið „Dude Looks Like a Lady“ með Aerosmith undir, sem á íslensku myndi útleggjast sem „Gaurinn lítur út eins og kona“.

Þá hefur sjónvarpsstöðin einnig verið gagnrýnd fyrir að vísa til Mannings í karlkyni, en ekki kvenkyni eins og aðrar fréttastofur víða um heim gera eftir að hún tilkynnti um kynleiðréttinguna. 

Í yfirlýsingu frá Manning sem var send út þann 22. ágúst síðastliðinn segir að hún hafi áttað sig á því snemma í æsku að hún væri kona föst í líkama karlmanns og óskar eftir stuðningi almennings við þessa ákvörðun sína og það ferli sem nú er að hefjast.