Vísbendingar fundust um að efnavopnum hafi verið beitt

Sönnungargögn á vettvangi loftárásanna í Damaskus gefa til kynna að þar hafi verið notast við efnavopn. Þetta sagði Lakhdar Brahimi, sendifulltrúi Sameinuðu þjóðanna gagnvart Sýrlandi, á blaðamannafundi í morgun.

„Svo virðist sem einhvers konar efni hafi verið notað, sem olli dauða fjölmargra. Hundruða, alla vegana fleiri en eitt hundrað. Sumir vilja meina að það hafi verið 300 manns, aðrir 600 eða jafnvel 1.000," sagði hann.

Brahimi tjáði sig ekki frekar um hvort hann byggði mat sitt á gögnum frá rannsóknarteymi Sameinuðu Þjóðanna sem er nú að störfum í Sýrlandi, eða frá öðrum aðilum, til dæmis Bandaríkjunum, sem John Kerry utanríkisráðherra sagði að byggju yfir „óhrekjandi" sönnunargögnum um að umhafi verið að ræað meirháttar efnavopnaárás, sem stjórnarherinn beri sennilega ábyrgð á.

Brahimi undirstrikaði einnig að hernaðaríhlutun þurfi fyrst að samþykkja í Öryggisráðinu.

Til að öryggisráðið samþykki aðgerðir þarf samþykki allra fimm landa sem eiga þar fastafulltrúa en líklegt þykir að Kína og Rússland muni beita neitunarvaldi gegn ályktunum um aðgerðir. Kínverjar og Rússar hafa meðal annars líkt framvindu mála nú við aðdragandann að Íraksstríðinu.

Ban Ki Moon, framkvæmdastjóri Sameinuðu þjóðanna biðlaði í morgun til alþjóðsamfélagsins um að friðsamleg lausn verði fundin í málefnum sýrlands.

Nú bendir margt til þess að vesturveldin séu að stefna að beinni íhlutun í borgarastyrjöldina í Sýrlandi í kjölfar fyrrnefndrar efnavopnaárásar.

Ban sagði að rannsóknarteymi Sameinuðu þjóðanna, sem nú væri að störfum á vettvangi, þyrfti tíma til að ljúka störfum áður en gripið verði til aðgerða.

Bretar ætla í dag að leggja fram ályktun í öryggisráði Sameinuðu þjóðanna þar sem efnavopnaárásirrnar eru fordæmdar.

Samkvæmt yfirlýsingu frá David Cameron forsætisráðherra Bretlands, munu þeir þrýsta á um að gripið verði til nauðsynlegra aðgerðra til þess að verja óbreytta borgara í Sýrlandi.