Telja að brögð hafi verið í tafli

Andstæðingar, Roberts Mugabe, forseta Zimbabwe, hafa kært nýlegar kosningar í landinu á þeim forsendum að brögð hafi verið í tafli. Ólíklegt er talið að dómstólar taki mark á kærunni.

Mugabe, sem er 89 ára, er sakaður um kosningasvindl en hann var endurkjörinn í embætti forseta landsins með ríflega sextíu prósent atkvæða. Mótframbjóðandi hans, Morgan Tsvangirai fékk 34 prósent atkvæðanna.

Þá vann flokkur Mugabes stórsigur í þingkosningunum. Zanu, flokkur Mugabes, fékk 160 þingsæti gegn 49 hjá MDC flokknum, Hreyfing fyrir lýðræðislegum breytingum í Zimbabwe. Stjórnarandstaðan krefst þess að boðað verði til nýrra kosninga nú þegar þar sem um greinilegt kosningasvindl var að ræða í þeim síðustu.

Vestrænir eftirlitsmenn segja augljóst að ekki hafi allt verið með felldu í kosningunum. Til að mynda hafi um 300 þúsund manns verið vísað frá kjörstöðum og á móti hafi um 200 þúsund manns hafi fengið aðstoð við að greiða atkvæði. Ekki er reiknað með að dómstólar taki mark á kvörtunum stjórnarandstöðunnar og því líklegast að Mugabe verði áfram við völd í Zimbabwe.