Sex flóttamenn fórust við Sikiley

Sex manns drukknuðu þegar fiskibátur með flóttamönnum á leið til Evrópu frá Afríku strandaði við ítölsku eyjuna Sikiley. Líkin fundust á fjölmennri baðströnd, þangað sem þau hafði rekið.

120 manns voru í bátnum og náðu flestir að synda í land. Þeir látnu voru ósyndir. Að sögn landhelgisgæslunnar á Sikiley er leiðin sem báturinn fór mjög hættuleg, en báturinn strandaði aðeins rúmlega 15 metrum frá baðströnd við borgina Cataníu.

Allir flóttamennirnir um borð voru undir þrítugu. Talið er að flestir þeirra séu frá Sýrlandi og Egyptalandi. Fjölmargir Sýrlendingar flýja nú land vegna borgarastyrjaldar í landinu. Þúsundir flóttamanna freista þess að komast til Evrópu í gegnum suðurströnd Ítalíu ár hvert.