Tveir létust í rútuslysi í Noregi

Tvær konur létust í Sogndal í Noregi í gær þegar saman rákust sænsk rúta með ferðamenn og norsk rúta sem sinnti áætlunarakstri á heimaslóð. Konurnar sem létust voru hvor í sinni rútu, önnur norsk og hin ferðamaður frá Taívan.



Þá slasaðist fjöldi farþega, sumir alvarlega. Að því er fram kemur í Bergens Tidende voru tvær aðrar konur fluttar alvarlega slasaðar á Haukeland-háskólasjúkrahúsið í Bergen. Sex aðrir farþegar voru fluttir á sjúkrahúsið í Førde og einn fékk læknishjálp í Sogndal.

Þeir sem slösuðust voru allir farþegar í sænsku rútunni. Í henni voru ríflega tuttugu ferðamenn frá Asíu í hringferð um Norðurlönd. Sjö farþegar voru í norsku rútunni.

Haft er eftir lögreglu í Sogn og Fjordane-umdæmi að tilkynning hafi borist um slysið tveimur mínútum fyrir fimm í gær. Loka þurfti vegninum milli Sogndal og Leikanger í nokkrar klukkustundir vegna slyssins og varð vegna þessa nokkur röskun á samgöngum á svæðinu.