Erfðaefni úr ketti gagnast við sakfellingu

David Hilder var í síðustu viku sakfelldur í Bretlandi fyrir að hafa myrt nágranna sinn á síðasta ári.

Það var erfðaefnið úr kettinum hans, honum Tinker, sem varð Hilder að falli fyrir dómstólum. Hár af kettinum fannst nefnilega á líki nágrannans, sem Hilder hafði bútað sundur og losað sig við.

Vísindamenn við háskólann í Leicester, sem hjálpuðu til við rannsókn málsins, segja þetta sýna fram á gagnsemi þess, að til sé gagnabanki með upplýsingum um erfðaefni gæludýra. Þessir vísindamenn hafa komið sér upp gagnabanka um 152 ketti.