Spænskir sjómenn mótmæltu við Gíbraltar

Spænskir fiskimenn sem stunda veiðar í nágrenni við yfirráðasvæði Breta á Gíbraltar mótmæltu í dag framkvæmdum út af ströndum landsvæðisins umdeilda.

Þar hefur um 70 steypueiningum verið sökkt til að búa til nokkurs konar tilbúið rif til að koma í veg fyrir togveiðar, en Spánverjarnir kvarta yfir því að með þessu sé verið að eyðileggja gjöful fiskimið.

Spænskir sjómenn á um 60 bátum komu saman á svæðinu í dag til að mótmæla gerð rifsins, en þeim var loks smalað saman og út fyrir breskt yfirráðasvæði.

Deila milli Breta og Spánverja vegna Gíbraltar hefur harðnað upp á síðkastið og hafa Spánverjar meðal annars hert á eftirliti á landamærunum yfir til Gíbraltar, sem hefur lotið breskri stjórn frá árinu 1713.

Bretar hafa beðið Evrópusambandið um að skoða aðgerðir Spánverja og meta hvort þar sé um að ræða brot á fjórfrelsi ESB varðandi frjálsa fólksflutninga.