Segir Múbarak sleppa innan tveggja daga

Hosní Múbarak, fyrrverandi forseti Egyptalands, sem var steypt af stóli í uppreisn árið 2011, verður látinn laus innan tveggja daga að sögn lögfræðings hans. Guardian segir frá þessu á vef sínum.

Múbarak, sem er 85 ára og heilsuveill, hefur verið í haldi frá því að hann lét af embætti og sætti margs konar ákærum, meðal annars vegna spillingar á rúmlega 30 ára valdatíð sinni.

Fareed el-Deeb, lögmaður Múbaraks, sagði í samtali við fjölmiðla í dag að fallið hafi verið frá ákærum í einu spillingarmálinu og það eina sem eftir stæði yrði sennilega leyst innan skamms.

„Það sem eftir stendur varðar einfalt stjórnsýslumál, sem ætti ekki að taka meira en 48 stundir að leysa. Hann ætti að vera laus úr haldi fyrir vikulokin,“ sagði Deeb.

Múbarak á enn yfir höfði sér dóm vegna samsektar vegna morða á mótmælendum á meðan uppreisninni stóð árið 2011. Hann var sakfelldur í málinu í fyrrasumar og dæmdur í lífstíðarfangelsi, en áfrýjunardómstóll ógilti dóminn og vísaði málinu aftur til dómstóla.