Borðaði heila og hjarta fjölskylduvinar

Alex Kinyua, tuttugu og tveggja ára gamall bandarískur ríkisborgari, var í dag sakfelldur fyrir að hafa myrt fjölskylduvin og lagt heila og hjarta hans til munns.

Kinyua, sem á ættir að rekja til Kenía, viðurkenndi að hafa stungið þrjátíu og sjö ára gamlan fjölskylduvin til dauða. Eftir morðið lagði hann innyfli hans sér til munns, meðal annars hjarta hans og hluta af heilanum. Lík fjölskylduvinarins fannst fjórum dögum eftir að lýst hafði verið eftir honum í maí á síðasta ári.

Dómarinn í málinu sagði í dag að hann hefði miklar áhyggjur af Kinyua. Hann sakfelldi hann fyrir morð af yfirlögðu ráði en sagði að hann væri ekki ábyrgur á gjörðum sínum vegna augljósra andlegra veikinda.

Hann dvelur nú á geðsjúkrahúsi.