Segja að hundruðum þúsunda hafi verið vísað frá kjörstað í Simbabve

Miklir ágallar voru á kosningunum sem fóru fram í Simbabve í gær þar sem allt að milljón kjósenda var vísað frá kjörstað áður en þau fengu að kjósa. Þetta segir í skýrslu sem Zimbabwe Election Support Network, stærsti sjálfstæði eftirlitsaðilinn með kosningunum í Simbabve, birti í dag og BBC segir frá.

Meðal þess helsta sem fram kemur í skýrslunni er að kjósendum í borgum, þar sem Morgan Tsvangirai, helsti keppinautur Mugabe forseta, er sterkastur hafi verið vísað frá í mun meiri mæli en í dreifðari byggðum þar sem Mugabe nýtur meiri stuðnings. 82% kjörstaða í borgum hafi vísað fólki frá, en um 40% kjörstaða í dreifðari byggðum.

Auk þess bárust fréttir af því að þorpshöfðingjar og önnur fyrirmenni hefðu víða smalað fólki á kjörstað og fylgst með því að þau myndu greiða atkvæði eftir fyrirskrift.

Tsvangirai sagði kosningarnar hafa verið farsa, en Mugabe hefur þegar lýst yfir sigri þrátt fyrir að úrslit muni ekki liggja fyrir fyrr en eftir fimm daga.

Áður hafði Mugabe bannað vestrænum eftirlitsaðilum að fylgjast með kosningunum, en afrískar stofnanir sem hlutu náð fyrir augum forsetans höfðu ekkert að athuga við framkvæmdina.