Maríjúana lögleitt í Úrúgvæ

Neðri deild úrúgvæska þingsins samþykkti í gær frumvarp um lögleiðingu maríjúana eftir rúmlega tólf klukkustunda langar umræður um frumvarpið.

Vonast ríkisstjórnin til að lögleiðingin verði til þess að draga úr glæpum tengdum fíkniefnasölu, en stefnt er að því að öll ræktun og dreifing efnisins verði á vegum ríkisins. Efnið verður selt í apótekum, kaupendur þess verða skráðir og þurfa að hafa náð 18 ára aldri hið minnsta.

Úrúgvæ er því skrefi nær því að verða fyrsta land heims til að lögleiða framleiðslu, dreifingu og sölu efnisins. Málinu verður næst vísað til efri deildar þingsins þar sem verður kosið um það í október, en ríkisstjórnin heldur meirihluta þingsæta og er því talið að lögin verði samþykkt.

Alþjóðafíkniefnaráð Sameinuðu þjóðanna (INBC) lýsir áhyggjum yfir yfirvofandi lögleiðingu og segir hana geta haft alvarlegar afleiðingar í för með sér. Þá segir ráðið lögin brjóta gegn fíkniefnasáttmála Sameinuðu þjóðanna frá árinu 1961.