Jarðneskar leifar á fóninn

Fyrirtækið And Vinyly (rímar við „And finally“) býður upp á nýstárlega þjónustu fyrir tónlistarunnendur sem falla frá. Þeir geta nú að bálför lokinni látið aðstandendur senda öskuna til fyrirtækisins þar sem hún er steypt inn í glærar vínylplötur.

Þrjátíu plötur kosta rúmlega hálfa milljón og fyrir þá sem eru tvístígandi með tónlistarvalið á plötuna býðst fyrirtækið til þess að búa til tónlist á hana. Sú þjónusta kostar um 90 þúsund krónur fyrir hvert lag.

Jason Leach, stofnandi fyrirtækisins, segist hafa afgreitt fjórar pantanir hingað til, og meðal þeirra voru plötur sem innihéldu ösku plötusnúðs. Foreldrar hans vildu að þær yrðu spilaðar á eftirlætisklúbbum hans.