Þingmönnum bannað að snerta tærnar á Thatcher

Starfsmenn breska þingsins hafa farið fram á að þingmenn hætti að snerta tærnar á styttum fyrrverandi forsætisráðherra, svo sem Margrétar Thatchers og Winstons Churchills.

Nokkuð löng hefð mun vera fyrir því að áður en þingmenn ganga inn í þingsalinn snerti þeir tærnar á þessum styttum, sem eru í andyrinu. Það á að færa þeim gæfu, samkvæmt einhverri hjátrú sem náð hefur að festa rætur í breska þinginu.

Vandinn er sá að tærnar á þessum styttum liggja undir skemmdum. Starfsfólki þingsins er hætt að litast á blikuna og íhugar að girða þær af.

Listaverkanefnd þingsins hefur nú samþykkt að sett verði upp skilti við stytturnar, þar sem á standi: „Ekki snerta.” 

AP fréttastofan skýrir frá þessu.