Féll niður 17 hæðir á fyrsta stefnumótinu

Kona lést þegar hún féll niður 17 hæðir íbúðarblokkar í New York í gærkvöldi.

Hin 35 ára gamla Jennifer Rosoff var úti á svölum íbúðar sinnar að reykja sígarettu ásamt karlmanni þegar hún hallaði sér upp að handriðinu. Karlmaðurinn, sem var á sínu fyrsta stefnumóti með Rosoff, segist hafa varað hana við en skömmu síðar hafi handriðið gefið sig með fyrrgreindum afleiðingum.

Rosoff lenti á stillans á fyrstu hæð og lést samstundis. Skýrsla var tekin af karlmanninum en lögregla telur að um slys hafi verið að ræða. Verið er að rannsaka hvað varð til þess að handriðið gaf sig, og hvort aðrar svalir hússins séu öruggar.