Frakkland vinsælast meðal ferðamanna

Flestir sem ferðast kjósa að sækja heim Frakkland. En samkvæmt tölum frá Ferðamannasamtökum Sameinuðu þjóðanna komu 83 milljónir ferðamanna til Frakklands. Það er töluvert yfir fólksfjölda landsins en þar búa 66 milljónir. Frakkland hefur vermt efsta sætið á hverju ári síðan Sameinuðu þjóðirnar tóku upp á því að birta tölur yfir ferðamenn.

Í öðru sæti listans eru Bandaríkin. Þangað koma 67 milljónir ferðamanna á hverju ári, það eru 16 milljónum færri en koma til Frakklands. Kína, Spánn og Ítalía fylla síðan efstu 5 sætin. Ísland náði ekki inn á listann en tæplega 620 þúsund ferðamenn heimsóttu landið í fyrra. Það er, eins og glöggir taka eftir, tvöfaldur fólksfjöldi landsins.

Af ferðamannahópnum sem heldur til Frakklands á ári hverju fara 16,8 prósent til höfuðborgarinnar. Það gerir París að þriðju vinsælustu ferðamannaborginni. Vinsælasta borgin hjá ferðamönnum er Bangkok með 15.98 milljón ferðamenn á ári en London fylgir fast á eftir með 15.96 milljónir. Þetta kemur fram í rannsókn á vegum Mastercard.