Sendiráðin lokuð fram yfir næstu helgi

Bandarísk stjórnvöld ætla að halda sendiráðum í Norður-Afríku og Mið-Austurlöndum lokuðum fram að næstu helgi hið minnsta af ótta við hryðjuverkaárásir en þau lokuðu 21 sendiráði í gær.

Sendiráðum í  Bagdad, Dúbaí, Kúveit og Kaíró í Egyptalandi verður meðal annars lokað. Bresk stjórnvöld ætla að halda sendiráði sínu í Jemen lokuðu þar til fram yfir trúarhátíðina Eid sem fram fer á fimmtudag.

Eins og fram kom á Vísi í gær funduðu fulltrúar frá utanríkisráðuneyti Bandaríkjanna með stjórnendum leyniþjónustu Bandaríkjanna, alríkislögreglunni og Barack Obama, Bandaríkjaforseta vegna málsins. The New York Times greindi frá því að líkur séu á að skotmörk hryðjuverkanetsins al-Kaída séu miðpunktar almenningssamgangna nokkurra stórborga ásamt innviðum ferðaþjónustu.

Þá voru viðvaranir gefnar út til allra bandarískra ríkisborgara á faraldsfæti um að hafa varann á. Fréttamiðlar vestanhafs hafa greint frá því að viðbúnaðurinn tengist fangelsisflótta fjölmargra liðsmanna al-Kaída í Írak, Pakistan og Líbíu á síðustu dögum.