Grunur um sprengju í Kaupmannahöfn

Lögreglan í Kaupmannahöfn hefur rýmt stórt svæði í kringum Kóngsins nýjatorg, en grunsamleg bifreið í bílageymslu við torgið er talin geta innihaldið sprengju.

Stórt svæði í kringum torgið hefur verið rýmt í kjölfarið og eru sprengjusérfræðingar á leið að torginu.

Að sögn TV2 er um að ræða gamla bifreið af gerðinni Volkswagen Golf á sænskum númerum. Rafgeymir er sagður vera á bak við bílstjórasætið og vírar úr geyminum sem liggi ofan í hvítt ílát.

Þá hefur TV2 einnig greint frá sprengjuhótun sem barst símleiðis til nálægrar prentsmiðju í morgun, en lögreglan hefur ekki viljað staðfesta það.