Fyrirfór sér eftir einelti á netinu

Faðir fjórtán ára breskrar stúlku sem fyrirfór sér eftir að hafa orðið fyrir einelti á internetinu biðlar til David Cameron forsætisráðherra að sjá til þess að haft sé eftirlit með samfélagssíðum.

Dóttirin, Hannah Smith, fyrirfór sér á föstudag eftir að hafa orðið fyrir barðinu á netníðingum á vefsíðunni Ask.fm. Var meðal annars gert grín að holdarfari hennar, dauðsfalli í fjölskyldunni og hún hvött til að svipta sig lífi.

„Vefsíður sem þessar eru eineltissíður vegna þess að fólk getur skrifað undir nafnleynd,“ segir faðirinn, Dave Smith. „Ef ég hefði ekki vakið máls á þessu gæti annar táningur dáið í næstu viku.“

Smith segir Ask.fm og sambærilegar síður græða milljónir á eymd annarra og að það sé rangt.

„Ég vil beina orðum mínum að David Cameron, forsætisráðherra og föður, til að skoða málið og tryggja að settar séu reglur um vefsíður af þessu tagi, til þess að einelti gegn varnarlausu fólki eins og dóttur minni geti ekki átt sér stað.“