Dæmdir fyrir hrottleg morð á sígaunum

Fjórir menn voru í gær dæmdir í Ungverjalandi sekir um dráp á sex sígaunum í árásum sem drifnar voru af kynþáttahatri.

Meðal fórnarlamba var fimm ára gamalt barn. Árásirnar á sígaunafjölskyldurnar áttu sér stað í norð-austanverðu Ungverjalandi á árunum 2008 og 2009. Þær voru hrottalegar og skóku Ungverjaland. Lögreglan var sökuð um andvaraleysi við rannsókn málsins.

Þrír mannanna fengu lífstíðar fangelsisdóm en einn fékk þrettán ár. Mennirnir notuðu byssur, handsprengjur og bensínsprengjur í níu árásum sem stóðu yfir í fjórtán mánuði. Í einni árásanna var eldur lagður að húsi og þegar faðir og fimm ára gamall sonur hans reyndu að flýja voru þeir skotnir niður á flóttanum af genginu. Þetta var í Tatarszentgyorgy og var samfélag sígauna lamað af ótta í kjölfar þessara hrottalegu morða.

Mennirnir fjórir viðurkenndu aðild að árásunum en sögðust allir saklausir af morðum. Framburður þeirra þótti ekki sannfærandi. Tveir mannanna hafa tengsl við róttæk þjóðernissamtök.