Allt flug til og frá Kenýa liggur niðri

Miklir eldar loga nú á Jomo Kenyatta flugvellinum í Nairobi, höfuborg Kenýa.

Flugvöllurinn er ein helsta samskiptaæð Austur-Afríku en þar um fer millilandaflug sem tengir lönd á því svæði. Flugvellinum hefur nú verið lokað, hann hefur verið rýmdur og hefur öllu flugi verið aflýst til og frá vellinum.

Mikill og kolsvartur reykur stafar frá eldinum sem gefur til kynna að þar brenni olía og gúmmí. Ekki hafa neinar fregnir borist af slysum og eru eldsupptök ókunn. BBC hefur eftir Michael Kamau samgönguráðherra að eldurinn sé illviðráðanlegur og er fólk hvatt til þess að halda sig fjarri.