Lestarstjórinn var úthvíldur

Julio Gomez-Pomar, yfirmaður lestarfyrirtækisins, sem átti og rak lestina sem fór út af sporinu í norðurhluta Spánar í lok síðasta mánaðar, með þeim afleiðingum að 79 fórust og 170 slösuðust, segir að áhöfn lestarinnar hafi ekki tilkynnt um nein vandamál í lestinni fyrir slysið.  Öll öryggisatriði lestarinnar hafi verið í lagi.

Þetta kom fram í máli hans fyrir rannsóknarnefnd á vegum spænska þingsins í dag. Lestarstjórinn, Francisco Jose Garzon Amo, hafi verið úthvíldur þegar slysið átti sér stað - hann hafi verið nýkominn úr tveggja daga fríi.

Amo hefur ekki verið ákærður fyrir að bera ábyrgð á slysinu en lestin var á 190 kílómetra hraða, eða á tvöföldum hámarkshraða. Þá hafa spænsk yfirvöld einnig staðfest að Amo hafi verið í símanum þegar slysið varð.