Fórnarlömb rútuslyssins borin til grafar

Fjöldaútför fór fram í bænum Pozzuoli á Ítalíu í dag, en þar voru þeir 38 einstaklingar sem létu lífið í rútuslysi fyrr í vikunni bornir til grafar. Fjögur þúsund manns, þar á meðan forsætisráðherra Ítalíu, mættu í útförina sem haldin var á íþróttaleikvangi í bænum. Slysið er eitt mannskæðasta rútuslys síðari ára í Evrópu.

Ekki er ljóst um tildrög slyssins en rannsókn er nú í fullum gangi. Fjölmiðlar á Ítalíu hafa þó eftir sjónarvottum að rútan hafi ekið á leyfilegum hraða þar til að hún fór að rása á veginum og ók utan í aðra bíla. Einhverjir töldu sig hafa heyrt hvell sem benti til þess að hjólbarði hafi sprungið. Til stendur að rannasaka hvort hemlunarbúnaður bílsins hafi bilað, og hvort bílstjórinn sem er einn af þeim látnu, hafi verið undir áhrifum áfengis eða hreinlega sofnað undir stýri.

Rútan ók í gegnum steypta hliðartálma á fjallavegi um 60 kílómetra frá Napólí og féll niður um 30 metra með skelfilegum afleyðingum. 47 manns voru um borð í rútunni og í henni fundust 33 lík eftir slysið. Þrjú lík til viðbótar fundust nærru flakinu og tveir farþegar létust skömmu eftir slysið á sjúkrahúsi. Tíu manns liggja enn þungt haldnir á sjúkrahúsi, þar á meðal farþegar í bílum sem rútan rakst eftir að bílstjórinn hafði misst stjórn á henni.

BBC greinir frá.