Twitter viðurkennir að hafa brugðist þolendum hótana

Del Harvey, yfirmaður öryggismála hjá samfélagsvefnum Twitter, segir fyrirtækið hafa brugðist í tveimur hótunarmálum sem upp komu í Bretlandi í síðustu viku.

Það var femíníski aðgerðarsinninn Caroline Criado-Perez sem fékk nauðgunar- og morðhótanir á Twitter í síðustu viku eftir að hún hvatti til þess að rithöfundurinn Jane Austen myndi prýða 10 punda seðilinn. Í kjölfarið var 21 árs karlmaður handtekinn, en þegar Stella Creasy, þingkona Verkamannaflokksins, lýsti yfir stuðningi sínum við Criado-Perez fór henni að berast svipaðar hótanir.

Twitter var sakað um hægagang og linkind vegna hótananna en Harvey segir fyrirtækið hafa tekið hótununum alvarlega og að þær hefðu verið tilkynntar til lögreglu. Hann bætir því þó við að fyrirtækið verði að gera betur.