Steikjandi hiti - í orðsins fyllstu merkingu

Yfir tíu manns hafa látist í Shanghai í Kína síðustu viku vegna ofhitnunar í hitabylgju sem ríður nú yfir. Hitinn í borginni hefur verið í kringum 40°  síðustu daga og hefur ekki verið meiri í 140 ár.

Yfirvöld hafa gefið út viðvörun vegna hitans og óttast að hann fari hækkandi næstu daga. Aðeins pínulítil prósenta fólks í Kína er með loftkælingu heima hjá sér, og hafa margir leitað skjóls í verslunarmiðstöðvum, neðanjarðarlestum, í stöðuvötnum, ám og sundlaugum.

Myndband sem sjónvarpsstöð í Shanghai gerði í vikunni hefur farið eins og eldur í sinu um veraldarvefinn síðustu klukkutíma. Þar sést hvernig kjötsneið er steikt á gangstétt sem sólin hafði hitað upp. Þá er sýnt hvernig kerti bráðnar á gangstéttinni eftir aðeins nokkrar sekúndur. Í spilaranum hér að ofan er hægt að horfa á myndskeiðið.