Sjávarútvegsráðherra Færeyja: "Fáheyrt í samskiptum siðaðra þjóða!"

Jacob Vestergaard, sjávarútvegsráðherra Færeyja, fordæmir refsiaðgerðir ESB vegna síldveiða Færeyinga.

„Ég skil ekki að þeir skuli koma fram með þessum hætti og beita refsiaðgerðum gegn Færeyjum í stað þess að semja um málið við okkur og hin strandríkin,“ segir hann í samtali við Politiken.

„Það að beita refsiaðgerðum tel ég fáheyrt milli siðaðra þjóða og stuðlar ekki að því að leysa málið með skiptingu síldarkvóta milli strandríkjanna.“

Aðildarríki ESB ákváðu í dag að grípa til refsiaðgerða í málinu, en deila hefur staðið um einhliða ákvörðun Færeyinga á aflaheimildum úr norsk-íslenska síldarstofninum. Aðgerðirnar fela í sér bann við því að landa síld- eða makrílafurðum frá Færeyjum í ESB-löndum, þar á meðal Danmörku, sem á í ríkjasambandi við Færeyjar. Aðgerðirnar munu þó ekki koma til fyrr en eftir að þær hafa verið útfærðar nánar.

Mette Gjerskov, matvælaráðherra Dana, lýsti því yfir fyrr í dag að hún væri afar ósátt við þessa ákvörðun ESB sem var tekin með auknum meirihluta á vettvangi aðildarríkjanna 28.

Alþjóðahafrannsóknarráðið hefur lagt til að 619.00 tonn af síld verði veidd úr stofninum og gáfu Færeyingar sér einhliða kvóta upp á 105.000 tonn, sem nemur sautján prósentum af ráðlagðri heildarupphæð.

Vestergaard segir við Politiken að stjórnvöld í Færeyjum muni íhuga næstu skref í málinu, meðal annars hvort að aðgerðirnar verði kærðar til Alþjóðaviðskiptastofnunarinnar  (WTO) eða Alþjóðlega hafréttardómstólsins.

„Það er ýmislegt sem við getum gert, en við verðum fyrst að sjá hvernig aðgerðirnar verða endanlega útfærðar,“ segir hann.