Belgar eignast nýjan konung

Belgar eignast nýjan konung í dag, en Albert II hefur afsalað sér konungdómi eftir 20 ár við völd. Hann er 79 ára að aldri og taldi sig ekki geta sinnt skyldum konungs lengur.

Sonur hans, Filippus, er sjöundi konungur landsins og tekur hann við krúnunni við hátíðlega athöfn í dag. Albert bað þjóðina að styðja son sinn og óskaði um leið eftir því að innanlandsdeilur yrðu lagðar til hliðar og þjóðin héldist sameinuð, en landsmenn skiptast í flæmskumælandi norðurhluta og frönskumælandi sunnanmenn.

Albert nýtur mikilla vinsælda og þar sem Belgar hafa safnast saman fyrir krýningarathöfnina má sjá tilfinningarík skilaboð á borð við "Lengi lifi Albert".