Telur ástæðu til að endurskoða umdeild sjálfsvarnarlög

Fyrrverandi forsetaframbjóðandinn John McCain, sem tapaði í forsetakosningunum 2008 fyrir Barack Obama, var yfir sig hrifinn af ræðu forsetans um kynþáttamismunun í Bandaríkjunum og er sammála honum um að ástæða sé til að endurskoða lög í landinu um sjálfsvörn, meðal annars í heimafylki hans, Arizona.

Lögin hafa verið gagnrýnd í kjölfar réttarhaldanna yfir George Zimmerman, en hann var sýknaður af ákærum um morð á hinum 17 ára Trayvon Martin, sem hann segist hafa skotið til bana í sjálfsvörn.

McCain, sem er repúblikani, gagnrýnir flokksbræður sína sem telja margir að það að hrófla við lögunum verði mögulega til þess að vegið verði að stjórnarskrárlegum rétti þeirra til þess að bera vopn.

„Er ekki betra að ræða þessi mál frekar en að fordæma?“, spyr McCain og bætir því við að hann virði skoðanir þeirra en hann sjái ekki tenginguna.