ESB setur hernaðararm Hezbollah á hryðjuverkalista

Á fundi utanríkisráðherra Evrópusambandsins var samþykkt að hernaðararmur Hezbollah-samtakanna í Líbanon verði settur á lista yfir hryðjuverkasamtök.

Árás Hezbollah-liða á ísraelska ferðamenn í Búlgaríu á síðasta ári réði miklu um þessa niðurstöðu. 

Hezbollah-samtökin eru áhrifamikill stjórnmálaflokkur í Líbanon, en ESB vonast til þess að með því að setja einungis hernaðararm þeirra á þennan lista, þá eigi það ekki að hafa slæm áhrif á stjórnmál í Líbanon eða samskiptin við ESB að öðru leyti.

Þegar samtök eru komin á lista yfir hryðjuverkasamtök hefur það í för með sér að einstaklingar tengdir þeim fá ekki vegabréfsáritanir til ESB-ríkja. Einnig verða eignir samtakanna í bönkum ESB-ríkja frystar.

Hezbollah hefur jafnan neitað allri aðild að árásinni í Búlgaríu, en dómstóll á Kýpur komst í mars að þeirri niðurstöðu að einn liðsmaður Hezbollah hafi tekið þátt í að skipuleggja árásina.

Árásin var gerð í Burgas, vinsælum ferðamannastað á Svartahafsströnd Búlgaríu, og kostaði fimm ísraelska ferðamenn og einn Búlgara lífið.