Sakar egypska herinn um mannrán

Fjölskylda Múhameds Morsis, fyrrverandi Egyptalandsforseta, sakar egypska herinn um að hafa rænt föður sínum og segir herinn bera alla ábyrgð á öryggi Morsis.

Þetta er í fyrsta sinn sem einhver úr fjölskyldu Morsis tjáir sig opinberlega frá því honum steypt af stóli og settur í stofufangelsi í byrjun mánaðarins.

„Við lítum svo á að forsprakkar hinnar blóðugu herstjórnarbyltingar beri fulla ábyrgð á öryggi forsetans,” segir í yfirlýsingu frá fjölskyldunni, sem Sjaíma, dóttir hans, las upp í morgun.

„Það sem gerðist var eins konar mannrán,” sagði einn sona Morsis, Osama, sem er lögfræðingur. „Ég get ekki fundið neinar löglegar leiðir til að ná sambandi við hann.”

Hann segir að fjölskyldan hafi síðast séð Morsi þann 3. júlí, sama daginn og herinn tók af honum völd.

Bræðralag múslima, samtök Morsis, og aðrir stuðningsmenn hans hafa efnt til mótmæla í miðborg Kaíró nærri daglega frá því hann var sviptur völdum.