Japanskar konur aftur langlífastar

Árið 2012 gátu japanskar konur vænst þess að verða 86,41 ára. Þær voru því aftur orðnar langlífastar kvenna, eftir að hafa verið eitt ár í öðru sæti.

Íslenskir karlar verða hins vegar elstir allra karla, eða 80.8 ára að meðaltali.

Þetta er fullyrt í japönskum fjölmiðlum í dag, og vitnað í nýja skýrslu frá japönskum stjórnvöldum.

Næst á eftir Japönskum konum koma konur í Hong Kong, en lífslíkur þeirra voru 86,3 ár á síðasta ári. Þar á eftir koma konur á Spáni, í Frakklandi og Sviss.

Hvað karlana varðar, þá koma karlar í Hong Kong næst á eftir Íslendingum, en í þriðja sæti eru karlar í Sviss og þar á eftir kemur Ísrael.