Rannsóknin beinist að hraða lestarinnar

Rannsókn á orsökum lestarslyssins á Spáni er komin á fullan skrið. Enginn vafi leikur á að henni var ekið allt of hratt í beygju, stuttu áður en komið var inn á lestarstöð.

Rannsóknin beinist að því, hvort það hafi verið lestarstjórinn sem brást eða hvort innra hraðatakmörkunarkerfi hraðlestanna hafi ekki virkað sem skyldi.

Bandarískur farþegi segist hafa séð á skjá í lestarvagninum, sem hann sat í, að lestin hafi verið komin upp í 194 kílómetra hraða þegar henni var ekið í beygjunna. Fáeinum sekúndum síðar „lyftist lestin upp af teinunum. Þetta var eins og í rússíbana,” hefur AP fréttastofan eftir bandaríska farþeganum, sem heitir Stephen Ward og er 18 ára.

Hann missti meðvitund og rankaði fyrst við sér þegar einhver var að hjálpa honum að ganga út úr lestarvagninum. Hann segist hafa talið sig vera að dreyma þangað til hann fann fyrir blóði á andlitinu og tók eftir því sem var að gerast í kring.

„Allir voru útataðir í blóði. Það kom reykur upp úr lestinni,” sagði hann. „Það var mikið hrópað, mikið öskrað.”

Hámarkshraðinn þarna er 80 kílómetrar á klukkustund, þannig að lestin var á meira en tvöföldum hámarkshraða.

Slysið, sem varð á miðvikudagskvöld, kostaði 80 farþega lífið. Tugir slösuðust illa að auki. 94 eru enn á sjúkrahúsi.

Lestarstjórinn lifði slysið af og bíður yfirheyrslu.