Fara ekki fram á dauðadóm yfir Snowden

Eric Holder, dómsmálaráðherra Bandaríkjanna, hefur sent rússneskum stjórnvöldum bréf þar sem fram kemur að bandarísk stjórnvöld muni ekki fara fram á dauðarefsingu yfir uppljóstraranum Edward Snowden.

Þá kemur fram í bréfinu, sem stílað er á Alexander Vladimirovich Konovalov, dómsmálaráðherra Rússlands, að dauðarefsingar verði ekki krafist, jafnvel þó Snowden verði ákærður fyrir fleiri brot.

Snowden er enn í Rússlandi eftir að hafa flúið þangað frá Hong Kong í lok síðasta mánaðar. Hann hefur sótt um tímabundið hæli þar vegna þess að hann telur sig verða pyntaðan og dæmdan til dauða verði hann framseldur til Bandaríkjanna.