Þjóðgarði lokað vegna íkorna með svartadauða

Þjóðgarðurinn Angeles var rýmdur á dögunum vegna þess að í skógi á svæðinu fannst íkorni sem greindist með sjúkdóminn svartadauða. Yfirvöld í Los Angeles segja að enginn á svæðinu hafi smitast. Um málið var fjallað á vef BBC.

Sjúkdómurinn berst í menn ef þeir eru bitnir af sýktum flóm. Hann er lífshættulegur ef ekki er brugðist við með sýklalyfjum. Á miðöldum dró hann um 25 milljónir Evrópubúa til dauða.

Áður en tjaldsvæði garðsins verður opnað á nýjan leik stendur til að rannsaka fleiri íkorna á svæðinu og hreinsa íkornagreni til þess að fækka flóm. Þetta sagði Jonathan Fielding, forstöðumaður heilbrigðiseftirlits Los Angeles-sýslu. Hann sagði að þrátt fyrir að tjaldsvæði væru lokuð gæti fólk enn gengið í gegnum svæðið. Hann mælti þó með því að göngufólk notaði skordýrafælur.