Þrjú hundruð fallið síðustu daga

Stuðningsmenn Múhamed Morsí, fyrrverandi forseta Egyptalands, héldu mótmælum sínum áfram í Kaíró í nótt.

Utanríkisráðherra Bandaríkjanna hefur fordæmt aðgerðir yfirvalda gegn mótmælendum en hátt í þrjú hundruð hafa fallið frá því að Morsí var steypt af stóli.

Boðað var til friðsamra mótmæla á Frelsistorginu og þúsundir svöruðu kallinu. Torgið var þéttsetið af stuðningsmönnum Morsí og Bræðralags múslima.

Þess er krafist að Morsí verði leystur úr stofufangelsi hið snarasta og að hann fái að snúa til fyrri starfa.

Stjórnarherinn steypti Morsí af stóli þriðja júlí síðastliðinn. Skiptar skoðanir eru um valdaránið og er egypska þjóðin klofin í afstöðu sinni til Morsí, sem jafnframt var fyrsti lýðræðislega kjörni forsetinn í sögu Egyptalands.

Settur innanríkisráðherra landsins ítrekaði í ávarpi sínu í gær að mótmælendunum yrði brátt tvístrað. Stuðningsmenn létu fyrirmælin sem vind um eyru þjóta.

Rúmlega þrjú hundruð mótmælendur hafa fallið í átökunum á síðustu vikum og er nú deilt um hvort að um skipulögð fjöldamorð séu um að ræða.

John Kerry, utanríkisráðherra Bandaríkjanna, hefur fordæmt aðgerðir egypskra yfirvalda gegn mótmælendum. Hann sagði þarlend yfirvöld stunda mannréttindabrot og brjóta á stjórnarskrárvörðum rétti fólks til að safnast saman og mótmæla. Jafnframt hafi stjórnvöld virt málfrelsi fólks að vettugi.